Na sesión de control ao Executivo local do primeiro Pleno de 2025, Avia Veira quixo saber cales son as prioridades do gabinete de Inés Rey a respecto da ocupación do espazo público.

Para o BNG, unha delas sen dúbida debe ser a elaboración dunha nova Ordenanza sobre as Terrazas, un dos compromisos do Acordo de Investidura pendente de cumprimento por parte do Goberno Local.

A Ordenanza é necesaria para regular a forma en que estas instalacións ocupan o espazo público, nomeadamente nas beirarrúas e nas rúas peonís. “Cómpre unha ordenación que elimine os atrancos ao tránsito de carros de bebés, cadeiras de rodas e vehículos de emerxencia”, subliña Veira.

Resolver se as terrazas poden “continuar ou non” a ocupar prazas de aparcamento, asegurar que as persoas residentes podan acceder sen problemas aos seus portais e garantir o cumprimento dos horarios destas instalacións son cuestións a abordar nesa regulación.

Ao mesmo tempo que é preciso a elaboración dunha nova normativa, o Concello ten outra tarefa pendente, a de pór fin á situación irregular en que se achan as terrazas cubertas de María Pita, cuxa concesión ficou caducada en 2022, “sen que o Goberno Local se digne a dicir que pensa facer con elas, o que é moi grave tendo en conta que falamos dun espazo moi querido polas coruñesas e os coruñeses”.

Nada contestou ao respecto a concelleira de Infraestruturas e Mobilidade, o que non deixa de ser sinal do desleixo do Goberno Local nesta materia. Desde o BNG continuará a se ocupar desta cuestión nos próximos días.

Sobre a necesidade de elaborar unha nova ordenanza, Noemí Díaz afirmou que xa existe unha normativa que regula as terrazas, aínda que, precisou, “si necesita actualización e estamos a traballar nela. Temos un borrador que lles facilitaremos proximamente”, dixo en resposta ao BNG.

Consello Municipal da Cultura e políticas de turismo

Sobre estas dúas cuestións formularon senllas preguntas orais Mercedes Queixas e David Soto, a pór en destaque a desatención que estas materias teñen por parte do Goberno Local.

Nos dous casos, a resposta do concelleiro responsábel, Gonzalo Castro, tivo o habitual ton triunfalista e autocompracente, actitude que se compadece mal co feito de as últimas convocatorias do Consello Municipal da Cultura e da Xunta de Goberno do Consorcio para a Promoción do Turismo seren de maio de 2024 e de marzo do mesmo ano, respectivamente.

Aprobadas as tres mocións do BNG

De resto, o Pleno aprobou as tres mocións formuladas polo BNG neste Pleno ordinario, dúas delas por unanimidade, en concreto as referidas ás demoras na reforma do mercado de Monte Alto e a mellora da conexión por bus coa estación provisional dos camiños de ferro, ambas asinadas por Avia Veira. A terceira, a do impulso do Consello de Memoria Democrática, defendida por Mercedes Queixas, colleitou o apoio do PSOE e a abstención do PP.