Este servizo préstase en réxime de concesión, cun contrato que vai caducar en novembro. Soto mantivo recentemente unha xuntanza cunha representación do cadro de persoal, que lle manifestou a súa inquietude perante o feito de que o servizo se vaia prestar en precario, sendo que a día de hoxe nada se sabe dos pregos precisos para unha nova licitación.

“Estamos a falar dun servizo moi importante para a actividade deportiva na cidade, e nomeadamente para o deporte de base”, remarca Soto. Un servizo que non só está vinculado coas escolas deportivas, mais tamén coa organización de eventos como as carreiras populares.

O BNG defende que na redacción dos novos pregos se teñan en conta as demandas do cadro de persoal.

“O Goberno de Inés Rey ten que cumprir cos seus deberes e evitar que este servizo se vaia prestar en precario. E desde logo ten que ter en conta as moi razoábeis reivindicacións laborais das e dos traballadores, sendo que a metade do persoal está a tempo parcial e as súas retribucións superan por pouco o salario mínimo interprofesional”, resalta Soto.

O concelleiro nacionalista critica que, tal e como denuncia o persoal, o Goberno Local nunca tivo unha reunión con elas e eles para saber das súas condicións laborais e tomar nota das súas demandas.

O teor da pregunta oral do BNG é o seguinte: “Como valora o Goberno Local a súa xestión do servizo de actividades deportivas?”.