UNHA INICIATIVA DE FRANCISCO JORQUERA
Coñece o Goberno Local a deterioración que sofren as instalacións do Complexo Deportivo de San Diego?
O portavoz do BNG no Concello, Francisco Jorquera, dirixe un feixe de preguntas por escrito ao Goberno Local para saber se é consciente da deterioración que sofren as instalacións do Complexo Deportivo de San Diego, “con graves déficits de mantemento que afectan múltiples elementos”, desde “teitos de vestiarios caídos” até máquinas de ximnasio “obsoletas”.
No texto desta iniciativa, Jorquera salienta que a concesión do Complexo Deportivo de San Diego caducou en maio de 2020 (hai xa máis de tres anos!) e que, por tanto, “a empresa que o xestiona presta este servizo en precario”.
No mandato anterior, o Goberno Local optou pola vía de sacar a concurso o CD de San Diego conxuntamente co CD do Castrillón, “renunciando á xestión directa destes complexos en contra do criterio do grupo municipal do BNG”.
Como o Executivo coruñés non ten iniciado o proceso de licitación, Jorquera pregúntalle se continúa a optar por esa vía e se continúa a renunciar á xestión directa. “En caso afirmativo, cando está previsto que se inicie o proceso para a súa licitación?”, inquire.
Máis novas
