A procesionaria do piñeiro (Thaumatopoea pityocampa) é un lepidóptero defoliador, que se alimenta durante a maior parte do seu ciclo biolóxico das follas dos piñeiros.

A súa proliferación, refire Jorquera, está a xerar “unha importante preocupación social”, nomeadamente polo perigo que representa non só para a masa forestal -a praga pode provocar a morte dos piñeiros-, mais tamén para os animais de compañía e até para as crianzas.

“Exemplares desta ouruga teñen sido detectados nos últimos días por persoas usuarias do parque en zonas como a da Casa das Ciencias ou a máis próxima á Avenida de Arteixo”, advirte Jorquera.

Con este rogo escrito o BNG empraza o Goberno Local a que nos traballos de mantemento da masa arbórea do Parque de Santa Margarida “se teña presente a presenza de procesionaria do piñeiro e se articulen decontado os protocolos necesarios para evitar quer a súa extensión quer os problemas de saúde pública que da súa presenza se poidan derivar, mesmo sen desbotar a debida sinalización informativa dirixida á veciñanza que cada día desfruta deste importantísimo espazo público da cidade”.