Soto xa se interesa polo asunto cando no Pleno do pasado mes de outubro dirixiu un rogo oral ao Executivo coruñés. Tratábase, e trátase, de que as persoas sen fogar dispoñan “en varios puntos da cidade” dun lugar en que podan gardar de forma segura os seus efectos persoais.

A razón de rexistrar agora estas preguntas é porque desde outubro o Goberno Local non deu ningún paso para materializar a petición dese rogo oral.

Soto salienta que as súas iniciativas teñen como orixe “a situación en que se acha unha coñecida asociación desta cidade [Comité Cidadá AntiSida da Courña, Casco], que ofrece o servizo de consigna para persoas sen fogar e que, actualmente, se acha desbordada”.

Para o BNG, a creación deste servizo municipal -para o cal se requiriría “apenas un pequeno investimento”- daría resposta á “apremante necesidade” que teñen as persoas sen fogar, “pois é a única forma qeu teñen de gardar con seguridade os seus efectos persoais”.

Por tanto, Soto inquire o Goberno Local se ten pensado crear servizo, e en caso afirmativo, cando ten previsto facelo.