Arroupado por un nutrido grupo de persoas –entre elas Avia Veira e Mercedes Queixas, números 2 e 3 da candidatura do BNG-, o candidato do Bloque á Alcaldía, Francisco Jorquera, instou esta mañá ao Ministerio de Defensa a que “deixe de se comportar como unha inmobiliaria e a que ceda os seus terreos ao Concello, sen custo, para que A Coruña poda engrosar o seu parque municipal de vivendas”.

“Grazas ao traballo de anos de plataformas como Defensa do Común ou de colectivos como a Asociación Veciñal de Monte Alto, traballo que tivo sempre o apoio do BNG, estase abrindo paso unha vía que durante anos foi negada polo Goberno do Estado: a posta a disposición de soares do Ministerio de Defensa para a construción de vivenda social”, afirmou Jorquera. “Lembremos que o que pretendía Defensa era vender este soar de Adelaida Muro a unha inmobiliaria privada para que construíse vivendas de luxo. Felizmente iso xa non vai ser así”.

Mais o Ministerio de Defensa “continúa sen concretar de que propiedades dispón na cidade para as ceder ao Concello” e a fórmula que se vai recorrer é “moi confusa”. “Defensa vai vender os soares ao Ministerio de Transportes, Mobilidade e Axenda Urbana e este será quen constrúa as vivendas. Desde o BNG o que pedimos é que se deixe de marear a perdiz, que diga de cantos soares dispón e que se cedan gratuitamente ao Concello”, afirma Jorquera.

O Ministerio de Defensa “continúa sen concretar de que propiedades dispón na cidade para as ceder ao Concello” e a fórmula á que se vai recorrer é “moi confusa”.

A mesma confusión reina en relación ás propiedades da SAREB: “Durante anos defendemos que se cedesen ao concello e díxosenos que iso era imposíbel. Agora afírmase que as terá que mercar primeiro a Xunta para logo transferilas á administración local. Aquí tamén demandamos transparencia: que se esclareza o número de inmóbeis de que dispón o chamado banco malo e que estean en boas condicións de habitabilidade. E a partir de aí que se cedan gratuitamente ao Concello”.

En realidade, A Coruña o que precisa é un alcalde que “sexa esixente coas administracións competentes en materia de vivenda” e que “non se comporte como un delegado da Xunta ou do Estado na Coruña”. “As coruñesas e os coruñeses saben que un alcalde do BNG será dialogante, mais firme na defensa das necesidades e demandas da cidade”, dixo.

Non están en causa só os inmóbeis da SAREB ou os soares de Defensa. Hai outras propiedades do Estado español que se achan “totalmente en desuso e infrautilizadas” e que o Goberno central se nega a ceder á cidade, “tales como o cárcere –que se atopa nun estado vergoñento- ou o cuartel de Atocha, un edificio emblemático carente neste momento dun uso militar minimamente relevante”.

Avaliación inquéritos

Interpelado polos medios, Jorquera fixo a seguinte avaliación sobre os inquéritos publicados nas últimas horas.

“Nalgunhas das sondaxes aparezo como o candidato mellor valorado polas coruñesas e os coruñeses. As miñas grazas ás veciñas e veciños pola confianza que depositan en min.

En xeral, os inquéritos están a reflectir que o BNG é unha forza claramente en ascenso e que vai ser determinante na política municipal. É a única forza que, en relación a 2019, sobe en todas as enquisas publicadas. Mais non nos conformamos. Aspiramos a liderar politicamente esta cidade. Hai moito voto indeciso e a recta final de campaña vai ser decisiva”.

"Nalgunhas das sondaxes aparezo como o candidato mellor valorado polas coruñesas e os coruñeses. As miñas grazas ás veciñas e veciños pola confianza que depositan en min".

Jorquera expresa a súa convicción de que “aglutinando, concentrando o voto no BNG, é posíbel o cambio de rumbo que a cidade necesita”.

“Hai moitas coruñesas e coruñeses que saben que a vía do PP é un retorno a un pasado fracasado, hai moitas coruñesas e coruñeses que se senten decepcionados pola xestión do PSOE á fronte do Goberno Local. Esas veciñas e veciños ven necesario un cambio de rumbo. Chámoos a que concentren os votos no BNG porque ese é o xeito máis útil de lle imprimir ese cambio de rumbo á cidade”.