Jorquera valora como positivas algunhas das achegas incorporadas aos Acordos Estratéxicos -froito da realización de diversos talleres temáticos-. “Parécenos ben que se poña o acento en aspectos de sustentabilidade medio ambiental ou no rol que o porto interior debe continuar a xogar vinculado á economía azul, a actividade produtiva que, polas súas características, non pode ser trasladada á dársena exterior”, afirma.

Porén, a xuízo do BNG os Acordos Estratéxicos continúan a incorrer en contradición e a ser ambiguos sobre a forma en que se vai financiar o deseño da nova fronte marítima. Baixo o punto de vista do Bloque, e ese é o miolo das achegas da formación nacionalista hai que dar por definitivamente superados os convenios de 2004, isto é, hai que fechar a porta a calquera operación de venda de activos, de privatización de terreos, como medio para liquidar a débeda da Autoridade Portuaria.

O BNG continúa a defender a condonación por parte do Estado dun débito contraído pola construción do porto exterior. “Foi un Consello de Ministros o que acordou a construción. Se se condonou a débeda de València, non hai ningunha razón para que non se faga o propio coa nosa”, remarca Jorquera.

A Comisión Coruña Marítima reuniuse brevemente nun despacho do Espazo Avenida minutos antes de se realizar a presentación, nun acto público, do denominado Foro Coruña Marítima.