Carril: "O alcade é soberbio e ingrato [email protected] veciñ@s de Monte Alto"

Carril: "O alcade é soberbio e ingrato [email protected] veciñ@s de Monte Alto"

A Coruña, 5 de febreiro de 2013.- O portavoz do Grupo Municipal do BNG, Xosé Manuel Carril, acudiu esta mañá á biblioteca da A VV das Atochas-Monte Alto-Torre de Hércules para doar os libros que onte o alcalde rexeitou. Cando os concelleiros do PP tombaron no Pleno de onte a moción presentada polo BNG en defensa da biblioteca veciñal de Monte Alto, o portavoz nacionalista ergueuse e entregoulle ao alcalde Os libros arden mal, de Manuel Rivas, e mais Cantares Gallegos, de Rosalía de Castro. Nada máis rematar a sesión plenaria, o alcalde devolveu os libros, Carril insistiu en que quedase con eles e que se non os quería llos doase á biblioteca de Monte Alto e non o fixo. Finalmente, o alcalde rexeitou este agasallo simbólico do BNG contra o peche da biblioteca veciñal.

Despois de facerlle entrega dos libros a Alberte Fernández Mariño, presidente da asociación de veciños e veciñas, Carril sinalou en declaracións aos medios que os libros que lle agasallou ao Sr. Negreira recollían cadansúa dedicatoria escrita polo propio portavoz nacionalista. "Puxémoslle de manifesto que a elegancia e a cultura da cidade está nos barrios e nas súas xentes traballadoras, que foron artífices e sostén de bibliotecas como a de Monte Alto", expuxo. "Tamén lle lembramos que as bibliotecas, como os libros, arden mal, e que non son tan doadas de pechar", engadiu.

Carril afirmou ante os medios que "o alcalde demostrou que é bastante soberbio e ingrato, e non porque rexeitara os libros que lle agasallou o BNG; senón que é soberbio e ingrato cos barrios e cos movementos veciñais da cidade". "É soberbio e ingrato coas persoas que chegaron a hipotecar o seu patrimonio para financiar o crédito co que se construíu o edificio que alberga a biblioteca da asociación veciñal de Monte Alto", engadiu.

Como o alcalde renunciou a doar estes libros agasallados polo BNG, foi o propio Carril quen os doou, co fin de chamar a atención sobre a necesidade de que a biblioteca de Monte Alto volva abrir. "O alcalde ten que ser humilde e ten que recoñecer o valor desta biblioteca, que naceu grazas ao apoio dos veciños e veciñas", salientou.

Insistiu Carril en reclamar o que recolleu o BNG na moción que o PP non permitiu debater: recoñecer e defender o valor da biblioteca veciñal do barrio das Atochas-Monte Alto-Torre de Hércules como un centro de múltiples usos sociais esenciais para conseguir unha maior calidade de vida da veciñanza tanto deste barrio como doutros; garantir o financiamento da biblioteca a través da renovación do convenio coa asociación de veciños para permitir que este espazo volva abrir e garantir unha participación real e efectiva das asociacións veciñais nas tomas de decisión que atinxen os barrios en que estean implantadas estas entidades.

O presidente da A VV das Atochas-Monte Alto-Torre de Hércules chama o Goberno municipal a recapacitar e a renovar o convenio

Pola súa banda, o presidente da A VV das Atochas-Monte Alto-Torre de Hércules chamou o Goberno municipal a recapacitar e a renovar o convenio que permitiría manter aberta a biblioteca. "Nós non somos inimigos de ninguén", expresou, "o PP quere meternos no marco político ás entidades veciñais e culturais para atacarnos como se fósemos grupos da oposición". "Nós somos axentes sociais que e culturais que traballamos en defensa dos nosos veciños e veciñas e tratamos de minimizar os efectos dunha crise sistémica", engadiu.

Por último, Alberte Fernández puxo en valor o papel da biblioteca veciñal. "A diferenza entre esta biblioteca e a biblioteca municipal de Verea do Polvorín é que nesta biblioteca se atopa a alma e a vida de moita xente deste barrio", afirmou. "Cada libro ten detrás unha historia, porque moita xente doou os seus libros cando non os precisaba ou cando tiña que emigrar", expuxo.

Carril: "O alcade é soberbio e ingrato [email protected] veciñ@s de Monte Alto"