A Coruña, 4 de marzo de 2013.- O Grupo Municipal do BNG abstívose na votación da aprobación inicial da ordenanza reguladora da instalación de terrazas en espazos públicos. As nacionalistas non apoiaron a aprobación inicial ao entender que a ordenanza “non é nada técnica, fáltalle concreción real, é arbitraria e provoca inseguridade xurídica”, en palabras de Ermitas Valencia. “Trátase dunha falta de concreción que permite facer e desfacer a demanda e que pode ser perigosa á hora de conceder e denegar licenzas”, apuntou. “A arbitrariedade non vai axudar, en nada, nin ao sector nin a veciñanza”, engadiu.

A concelleira do BNG denunciou as incongruencias que recolle a exposición de motivos da ordenanza co articulado en cuestións como a “protección dos dereitos do pobo” ou “protección da paisaxe urbana”. Tamén denunciou que amplíe “descaradamente” o espazo susceptíbel de ser utilizado, “abrindo a man a terrazas-mamotretos como os de María Pita se leven a outras prazas da cidade”. Ademais, expuxo que a instalación de elementos fixos significa na práctica acurtar día e noite, e todo o ano, unha boa parte da vía pública.

Valencia sinalou que “a flexibilidade non é ocultación de criterios” e puxo de manifesto que “en lugar de resolver un problema, tantas excepcións á norma xeral van crear conflitos”. De aí que propuxera que a norma recolla as excepcións.

O PP está a afogar a hostalaría, mentres lle perdoa máis de 1 millón euros á Autoridade Portuaria

A concelleira do BNG denunciou na súa intervención que o sector da hostalaría “está a notar moito a crise, quizais esteamos no peor ano a nivel de baixada de consumo”. “En coherencia coas políticas antisociais que aplica o Sr. Rajoy desde Madrid, vostedes tamén pisan os pequenos, provocando a súa desaparición, para defender o grande”. “E isto ten un nome: neoliberalismo”, salientou.

Así, criticou que o Goberno municipal “apoie” o sector da hostalaría pretendendo recadar 200.000 euros dos petos dos e das autónomas e pequenas empresas familiares que rexentan, maioritariamente, a hostalaría da Coruña, despois de terlle perdoado máis de 1 millón de euros á Autoridade Portuaria ao conxelarlle o Imposto de Bens Inmóbeis (IBI).