Entre outubro de 2024 e decembro de 2025 rexistráronse até 18 accidentes laborais en Nostián e en outubro do ano pasado a Inspección de Traballo, a instancias dunha reclamación do comité de empresa, dirixiuse a Albada para que implementase unha serie de medidas con vistas a garantir a seguridade laboral, cun prazo máximo de cumprimento desas actuacións que expirou o pasado 3 de marzo.

Soto quere saber se o Goberno Local coñece o informe da Inspección de Traballo e, en caso afirmativo, que ten feito para garantir que Albada cumpre cos requirimentos que se lle teñen feito para protexer a saúde das e dos traballadores da planta.

Segundo a información que a representación do cadro de persoal ten trasladado ao grupo municipal do BNG, das esixencias que Inspección de Traballo impuxo a Albada, para o seu cumprimento antes do 3 de marzo, só se ten levado a cabo unha delas.

O concelleiro nacionalista inquire o Goberno Local se ten inspeccionado por si mesmo a planta nos últimos e, en caso de que así fose, en que datas e se ten emitido algún informe a partir desas visitas.

En definitiva, o BNG comparte a preocupación do cadro de persoal sobre a seguridade da planta nun contexto marcado polo feito de aínda estarmos á espera da licitación do novo contrato, a pesar de a concesión ter caducado en decembro de 2019 e as instalacións estaren moi deterioradas, o que obviamente incrementa os riscos laborais.