“Reparou o sr. Castro [concelleiro de Fomento e Promoción da Cidade do que depende Cultura] que entre as súas funcións e competencias están as bibliotecas?”, di o teor literal, claramente irónico, da cuestión que colocará Queixas na sesión plenaria.

“O Goberno Local ten que dar resposta ás múltiples demandas e necesidades das nosas bibliotecas e avanzar por fin cara á xestión pública integral que garanta un servizo de calidade”, afirma Queixas.

O BNG é claramente partidario da unificación da rede das bibliotecas municipais -parte das cales están concesionadas- baixo a fórmula da xestión directa por parte do Concello.

O estudo da internalización por parte do Concello é o obxecto da Comisión Especial das Bibliotecas cuxa posta en marcha aparece no Acordo de Investidura asinado por BNG e PSdeG.

Porén, no que vai de mandato a comisión só se reuniu unha vez, o pasado novembro. “Ten que se reactivar e facelo xa”, urxe Queixas. “Unha de cada dúas coruñesas son usuarias deste servizo. É imprescindíbel ofrecelo coa mellor calidade posíbel e resolver tamén a incerteza na que se atopan as traballadoras daquelas bibliotecas que están concesionadas, tendo en conta que o contrato coa empresa xa caducou, está no último ano de prórroga e non se sabe nada dos novos pregos”, reclama Queixas.

“O único que non merecen as nosas bibliotecas municipais é o silencio e a ausencia do Goberno Local”, concluíu.