Queremos felicitar ao tecido asociativo e á veciñanza da Agra do Orzán pola aparente decisión do Goberno municipal de lle buscar unha alternativa ao viaduto da Rolda de Nelle.

E é que lembramos que a polémica sobre a pervivencia deste paso en altura entre os barrios da Agra e o Paseo das Pontes ven de lonxe, xa que logo se trata dunha demanda histórica que xa foi formulada pola Asociación Veciñal da Agra do Orzán a principios da década pasada, e que deu lugar a múltiples reunións entre a propia entidade, representantes das comunidades veciñais da zona afectada e representantes municipais nos últimos tres mandatos.

Do mesmo xeito, tamén recordamos que esta era unha das actuacións propostas, e que calculabamos en 50.000 euros, que foi excluída nas súas emendas aos orzamentos municipais de 2018, e agardamos que o proxecto que finalmente se leve a cabo sexa realizado de xeito inmediato e que non se quede noutro anuncio do Goberno municipal que non teña continuidade na actuación.

A solicitude veciñal de lle dar unha alternativa a esta ponte remóntase a principios da década pasada e é unha demanda histórica da Asociación Veciñal da Agra do Orzán, que mesmo nós temos incorporado como unha iniciativa urbanística prioritaria nos nosos programas electorais de 2011 e 2015. Aledámonos de que por fin o Goberno da Marea Atlántica lle dea prioridade nas súas actuacións mais preguntámonos por que non se asumiu cando lla propuxemos a principio deste ano e se estará realizada antes de fin de mandato.

A Coruña, 11 de maio de 2018.

Artigos relacionados:

• O BNG reclama actuacións no viaduto da avenida de Fisterra