ANUNCIA NOVAS INICIATIVAS NO CONGRESO PARA AS MATERIALIZAR

Néstor Rego lamenta que os orzamentos do Estado non contemplasen as "demandas históricas da Coruña"

Rolda de prensa avaliación debate das emendas parciais aos orzamentos xerais do Estado. Néstor Rego e Francisco Jorquera.
I
“Os orzamentos xerais do Estado para 2021 non lle deron cabida ás demandas históricas da Coruña e o seu debate deixa nun mal lugar os deputados e deputadas galegos do PSOE e Unidas Podemos que non tiveron a decencia de defender esas reivindicacións no Congreso e que tampouco foron quen de dar o seu voto ás nosas emendas”, afirmou hoxe na Coruña o portavoz do BNG no Congreso, Néstor Rego.
Néstor Rego lamenta que os orzamentos do Estado non contemplasen as "demandas históricas da Coruña"

“A partir de agora, imos continuar a traballar en positivo e a apresentar iniciativas que contemplen a materialización desas demandas históricas”, anunciou a seguir o parlamentar nacionalista, quen compareceu perante os medios canda Francisco Jorquera, voceiro do BNG en María Pita, nun acto informativo convocado para avaliaren o debate das emendas parciais formuladas pola formación nacionalista ás contas xerais do Estado para 2021.

Explicou Rego que os orzamentos do Estado discriminan Galiza en xeral e A Coruña, a cidade e a comarca, en particular. “Xa non é só que se destinen 400 millóns para a condonación da débeda do porto de Valéncia e cero euros para a do porto da Coruña, xa non é só que se orzamenten 140 millóns para o acceso sur ao porto de Castelló e cero euros para o enlace ferroviario a Punta Langosteira, é que, alén diso, se consignan 1.500 millóns para a modernización dos servizos ferroviarios de cercanías no conxunto do Estado e desa cantidade virán cero euros para A Coruña e cero euros para Galiza, pola sinxela razón de que no noso país non temos servizos ferroviarios de cercanías”, denunciou o portavoz nacionalista.

O BNG si que se preocupou de levar ese asunto ao Congreso en forma de emendas aos orzamentos. “Infelizmente foron votadas en contra pola bancada do PSOE e de Unidas Podemos”, alegou Rego.

Entre o paquete de iniciativas que “nas próximas semanas e meses” formulará o BNG no Congreso en relación á nosa cidade e comarca, o portavoz nacionalista referiu as relativas á modernización das liñas ferroviarias A Coruña-Ferrol e A Coruña-Lugo, a conexión por camiño de ferro con Punta Langosteira –“crucial para que o porto exterior sexa viábel, non o será se non se conecta coa rede ferroviaria e logo co corredor atlántico de mercadorías”- ou o establecemento de compensacións económicas para as mariscadoras que se verán obrigadas a cesar nas súas actividades extractivas por mor das obras de dragaxe da Ría do Burgo.

“Todas estas, alén da condonación da débeda do porto, son propostas fundamentais para o desenvolvemento económico e social da Coruña. Puideron ter ido avante xa desta volta se se aprobasen as nosas emendas aos orzamentos. Non foi posíbel pola falta de sensibilidade mostrada por PSOE e Unidas Podemos”, engadiu Rego, quen recalcou que “se o BNG calase, ninguén defendería os dereitos deste país”. “Estou seguro de que o ano que vén o van pensar dúas veces [PSOE e Podemos] antes de enviar á cámara uns orzamentos tan negativos para Galiza e para A Coruña”, afirmou.

Por súa parte, Jorquera puxo en valor as emendas do BNG –reclamaban un incremento de 300 millóns de euros nos investimentos do Estado na nosa cidade e comarca- e remarcou que as propostas nacionalistas de mellora das contas do Estado puxeran “nerviosos a máis dun voceiro doutros partidos”.

Nervios que, esclareceu, derivan do feito de que non é posíbel xustificar por que se di non á condonación da débeda do porto da Coruña, ao acceso ferroviario a Punta Langosteira ou á modernización das liñas ferroviarias “que nos unen con Lugo e Ferrol” e, en troca, se diga si á liquidación do débito do porto de Valéncia ou se apoie o acceso por camiños de Ferro á dársena de Castellón.”

“O BNG non di unha cousa aquí e a contraria en Madrid”, concluíu Jorquera.

 

Néstor Rego lamenta que os orzamentos do Estado non contemplasen as "demandas históricas da Coruña"