E, con efecto, o parque infantil da Sardiñeira, sito na parte traseira do Centro Cívico dos Mallos, presenta un “importante estado de deterioración”, segundo puido constatar Jorquera. O pavimento amortecedor está inzado de buratos e rachaduras –co conseguinte risco de provocar caídas-, as fontes están secas e, relata o voceiro do BNG, “hai instalacións de xogos que non foron debidamente reparadas, caso dun columpio coas cadeas defectuosas, elementos que non foron substituídos, senón simplemente recortados”.

“Algúns dos xogos mesmo presentan elementos cortantes que poden mancar as crianzas”, alerta Jorquera. O cadro complétase con fochancas no medio da capa vexetal, o que torna o parque nunha lameira cando chove.

Estas deficiencias levaron as veciñas e veciños a formular unha proposta de reforma das instalacións nos orzamentos participativos. E a conseguir que finalmente fora seleccionada entre as actuacións a realizar por parte do Concello. Mais, advirte Jorquera, “non teñen información de cando se levará a cabo, pese a ser unha intervención simple e pouco custosa”.

A reforma visaría a ampliación da zona de xogos e a instalación de novos brinquedos para rapaces e rapazas de maior idade, pois as actuais instalacións están pensadas para as crianzas máis pequenas.