O lema co que se abría a marcha -"Combatividade feminista contra a violencia machista"-, da Coordenadora Galega da Marcha Mundial das Mulleres, resume á perfección o espírito da mobilización. "Menos discursos e máis recursos", outro dos cánticos que corearon as millares de persoas que se sumaron a esta andaina reivindicativa polas rúas da cidade, tamén.

"Patriarcado e capital, alianza criminal", "Soa, borracha, quero chegar a casa!", "Se é machista non é xustiza" ou "O xénero non binario tamén sofre a diario" foron algunhas das palabras de orde que se ouviron na marcha, con especial destaque para a xente moza, boa proba de que o feminismo está cargado de presente, mais tamén de futuro.

"Mulleres, oé, mulleres, oé, avanzan e non arrecúan", berraban millares de gorxas ao comezo da marcha. Pois é! O feminismo galego, cada día máis masivo e remozado, non vai parar até derrotar un patriarcado que non só oprime, senón que tamén mata.