O teor literal da pregunta que formulará Jorquera é o seguinte: “O Goberno Local está satisfeito co estado da limpeza da cidade e da xestión da recollida e tratamento de lixo?”.

Para o voceiro nacionalista, “os problemas da limpeza da cidade, lonxe de se solucionaren, van a máis” e desde logo non se arranxan porque agora se anuncie a entrada en funcionamento de novos medios materiais: “Non abonda con que agora se anuncien catro novas máquinas. Cómpre controlar de forma efectiva a calidade na prestación do servizo e desde logo hai que esixir o cumprimento das cláusulas técnicas por parte das empresas concesionarias, sen desbotar, se for preciso, a aplicación do réxime sancionado por parte do Concello”.

Fallan todos os aspectos relativos á limpeza da cidade, xulga Jorquera. Falla o tratamento do lixo, con reciclaxe practicamente cero segundo se tira da denuncia pública feita polos traballadores de Nostián. Falla a recollida, con cidadáns que chaman ao 010, seguen as súas indicacións para depositaren voluminosos, mais logo pasan mesmo semanas sen que estes sexan recollidos. E falla o combate contra a sucidade nas rúas: non houbo reforzos durante as festas nin se están a cumprir as condicións establecidas para a limpeza dos polígonos, zonas de lecer nocturno, nas praias de maio a outubro ou en xeral durante os períodos de caída da folla.

A impresións que ten o BNG é que o Concello non está a supervisar correctamente o cumprimento por parte das empresas concesionarias das cláusulas técnicas que rexen a prestación dos servizos.