Despois da suspensión nesta mañá da Comisión de Facenda onde se estaba a realizar o estudo das reclamacións presentadas á aprobación inicial dos orzamentos municipais de 2017, entendemos que no Concello da Coruña estamos nun “dèjá vu” permanente ao non se prever a curto prazo a aprobación definitiva, e onde tanto Marea Atlántica, Partido Popular e Partido Socialista manteñen posturas inflexíbeis e incompatíbeis cun mínimo de acordos para poder sacar adiante unha proposta.

E é que despois dos desencontros que se plasmaron na reunión, a actitude amosada polas demais forzas políticas é un sinal inequívoco de que os demais grupos municipais non están polo labor de mirar polos intereses da cidade senón só polos seus, independentemente dos custos que puideran derivarse, e cualificamos como incríbel a posibilidade de que se poida repetir unha situación a acontecida cos orzamentos de 2016.

Mais esta situación non sería unha sorpresa. Desde o BNG levamos advertindo desde o último trimestre do ano pasado que era unha posibilidade moi real e que había que artellar os mecanismos necesarios para este ano 2017 tiveramos os orzamentos a principios de ano fuxindo do espectáculo bochornoso que se deu o ano pasado. Porén tras as posturas amosadas pola Marea, PP e PSOE, e a incerteza amosada polo Goberno municipal ao non ter tomada unha decisión de como proceder a respecto da forma de aprobar ou rexeitar as reclamacións, non sabemos nin cando nin como se irá a Pleno, e coa posibilidade real de que se acabe aprobando un texto desequilibrado e con reparos da intervención. Isto considerámolo lamentábel.

Neste sentido, entendemos que o principal culpábel de que a situación se repita é o Goberno Municipal, que está amosar unha falta de cintura evidente, que non quere tomar decisións políticas e que non quere, non sabe ou no promove os mecanismos para chegar aos pactos necesarios para ter uns orzamentos, pois é precisamente o Executivo local quen debe facer as propostas e chegar a entendementos coas demais forzas políticas.

Xa advertimos precisamente ao alcalde e ao Goberno da Marea, xusto despois do Pleno da Cuestión de Confianza, que deberían iniciar un proceso de diálogo, durante o período aberto para a presentación da Moción de Censura e, de non presentarse, alongalo durante o período de presentación de emendas (ao entenderse aprobados inicialmente os orzamentos) para evitar que se chegara a un Pleno de aprobación definitiva onde se dera a posibilidade de que os orzamentos que finalmente se aprobaran estiveran condicionados por reclamacións que os desequilibraran e forzados a modificativos de crédito posteriores; a aquela altura o propio alcalde minusvalorou esta posibilidade.

Non nos cansaremos en reivindicar o noso traballo exhaustivo e rigoroso sobre as necesidades que ten cada barrio da cidade e os investimentos necesarios por áreas, que por certo, recollemos nunha alegación ordenada e equilibrada que incluía minoracións e altas. E non nos cansaremos en seguir traballando acudindo aos barrios a recoller esas demandas e en facer propostas, mais tamén advertimos que non estamos dispostos a participar de trapalladas e espectáculos que o único que conducen é a dar a sensación de que os grupos municipais están só a mirar polos seus intereses polo que recomendamos ás demais forzas que deixen de mirarse o embigo e comecen a pensar na cidade.

A Coruña, 24 de abril de 2017

Artigos relacionados:

• Un "si" aos orzamentos só no caso de que teñamos garantido a introdución das nosas achegas
• Que está facendo o Goberno municipal cos orzamentos de 2017?
• Para cando imos ter os orzamentos de 2017? 
• Repetiuse a trapallada do Pleno de abril e comezaremos o 2017 sen orzamentos
• Dous millóns para emprego, inclusión, cultura, educación, barrios... e non en externalizacións ou publicidade