O acto -que foi presentado pola presidenta da asociación cultural Alexandre Bóveda, María Xosé Bravo- comezou cunha ofrenda floral no sepulcro de Pedro Galán por parte dos seus familiares. Houbo música, da man do gaiteiro Moncho do Orzán, e un discurso, trufado de referencias históricas e literarias (de Uxío Novoneyra a Aurelio Aguirre), a cargo do escritor e ex deputado do BNPG-PSG Lois Diéguez.

Diéguez caracterizou Pedro Galán como o que foi, un mozo moi culto e activo socialmente, fundador das Mocedades Galeguistas da Coruña e do Clube do Mar de Santo Amaro, comprometido desde moi novo coas ideas nacionalistas, progresistas, pacifistas e anti-imperialistas. “Era, ademais, un extraordinario orador”, dixo Diéguez, quen se mostrou “moi honrado” por se fotografar a carón dun retrato do mozo de corpo enteiro.

Ese extraordinario orador participou o 11 de novembro de 1935 nun mitin no Teatro Rosalía contra a guerra que xa se albiscaba como inminente en Europa. “Sempre foi o nacionalismo galego un movemento pacifista e contrario ás guerras. Onte e hoxe”, salientou María Xosé Bravo. Naquel mitin o mozo coruñés foi o único en empregar a nosa lingua.

Diéguez louvou a enorme precocidade non só de Pedro Galán, senón tamén dos militantes que impulsaron o nacionalismo nas primeiras décadas do século XX. “Sempre tendemos a pensar que os membros da Xeración Nós eran persoas maduras. Pois non, era xente moza”, remarcou.

“A mocidade é parte fundamental do nacionalismo, de calquera revolución. Aqueles mozos non tiveron ao seu carón vellos dos que aprender e recibir algunha memoria. Hoxe si, hoxe as mozas nacionalistas si teñen canda si persoas de idade avanzada que lles poden servir dalgunha referencia”, reflexionou.

O canto do himno galego puxo fin ao acto, no que estiveron presentes o portavoz do BNG e candidato á Alcaldía, Francisco Jorquera, a concelleira Avia Veira e a parlamentar Mercedes Queixas.