O noso Grupo Municipal vén de rexistrar unha batería de preguntas escritas relativas áos 238.000 euros que ficaron sen executar en 2016 da partida destinada a cursos de formación para o emprego. É e que vimos de coñecer este dato a través dunha resolución de alcaldía.

Cremos que é inadmisíbel que nunha cidade con 19.063 persoa no desemprego, o Goberno Local deixe de destinar o 36% da partida destinada precisamente a cursos de formación que teñen a finalidade de mellorar a inserción sociolaboral destas persoas polo tanto pedímoslle explicacións a través desta iniciativa.

Asemade, na mesma iniciativa (podes vela premendo aquí), preguntamos sobre cada un dos cursos realizados en 2016, o custo de cada un deles e cales deses cursos tiveron un carácter novidoso a respecto dos que se viñan realizando con anterioridade desde a  Concellaría de Emprego e Economía Social.

Tamén queremos saber a través desta batería de preguntas escritas se a concellaría avaliou a efectividade destes cursos na inserción laboral das persoas desempregadas que os recibiron.

A falta de execución da partida de cursos de formación para o emprego reflicte a falta de ideas que ten o Goberno Local para afrontar o desemprego que asolaga a nosa cidade e que neste último mes subiu en 75 persoas e que a Marea Atlántica carece de iniciativa para afrontar un dos problemas máis graves da nosa cidade e non vemos máis accións fóra da elaboración e aprobación do Plan de Emprego Municipal.

Foi precisamente por iso que propuxemos para os orzamentos de 2017 a inclusión dunha partida para a elaboración dun Plan de Industrialización para a cidade e a comarca, precisamente nesa necesidade de liderado da cidade ante a pasividade doutras administracións públicas; a posta en marcha dun banco de locais comerciais, preciso para a rexeneración do tecido do pequeno comercio da nosa cidade; e mais a organización do Alén. Outlet de Comercio Local, moi necesario para promocionar tamén o noso pequeno comercio. Mágoa que, pola súa falta de entendemento co PSOE, o Goberno Local non fose quen de sacar os orzamentos de 2017 con estas inclusións.

A Coruña, 15 de marzo de 2017