"Vimos un Feijóo sen ideas, nervioso, sen nada que ofrecer. Un Feijóo que encarna o pasado. E fronte a el vimos unha Ana Pontón con enerxía e determinación e, sobre todo, con algo do que carece o PP, proxecto de país", afirmou Mercedes Queixas, quen partillou atril coa concelleira do BNG na Coruña Avia Veira e co tamén candidato Carlos Babío, número 8 da lista.

Para Queixas, a escolla o 12X está clara, as galegas e os galego teñen que decidir "entre partidos que dependen de Madrid ou unha formación política, o Bloque Nacionalista Galego, que confía nas potencialidades e nas capacidades da sociedade galega para se facer cargo de si propia sen necesidade de lle pedir permiso a ninguén".

A candidata fixo tamén un apelo á unha mobilización masiva o 12X, "de toda sociedade galega, mais moi especialmente da mocidade e das mulleres, nesta vainos o futuro, non podemos perder outros 4 anos, está en xogo o futuro dunha nova xeración, está en xogo a causa da igualdade", dixo.

É tempo de mudanza en Galiza, mais tamén o é na Coruña. "Os 11 anos de Feixóo na Coruña foron 11 anos de absoluta inacción na cidade e na comarca, de absoluto desleixo, de falta de asunción das súas responsabilidades", engadiu. O de Feixóo non só foi un goberno pésimo para A Coruña polo que non fixo, senón tamén polo que fixo: "Cando el chegou á Xunta en 2009 tiñamos un sistema financeiro propio. Que fica daquilo 11 anos despois? Nada, as caixas foron regaladas e o Banco Pastor foi absorbido. Eramos a capital financeira do país. Agora somos unha cidade máis fráxil e dependente. Ese é o legado que nos deixan Feijóo e o PP", concluíu.