A intención do Grupo de Barrio, a semellanza dos xa constituídos noutras áreas da cidade, é funcionar como unha canle aberta á participación de veciñas e veciños que se identifiquen co proxecto do BNG e queiran colaborar desde este espazo de traballo e iniciativas políticas, tanto da Gaiteira e Os Castros como de barrios limítrofes como o Montiño, Casabranca, San Diego, A Cubela, o Monte das Moas ou mesmo As Xubias.

O novo Grupo de Barrio da Gaiteira e Os Castros, un de cuxos integrantes, Nacho Siota, veciño da Gaiteira, integra a candidatura do BNG no posto número 5, bota a andar expresando o seu interese en asuntos como o futuro inmediato da fachada portuaria en San Diego, a dinamización económica do barrio, os graves problemas de accesibilidade en varias rúas, as necesidades de centros educativos como o CEIP Sal Lence, o deterioro de espazos públicos como o Parque Europa, a necesidade dunha solución para as galerías que comunican a Avenida de Oza coa rúa da Mercé, a recuperación da Capela de Oza como equipamento público, a afección patrimonial dos novos accesos ao CHUAC sobre o Pazo de Guyatt nas Xubias ou o risco medioambiental que suporía para as augas de Oza a planta de tratamento de hidrocarburos prevista na contorna.