Agora que acaba de transcender que, de acordo co informe encargado polo Concello, os murais de Urbano Lugrís se achan en estado “crítico”, é ben lembrar que xa o 23 de marzo o portavoz do BNG, Francisco Jorquera, instaba o Goberno Local a que tomase a iniciativa e restaurase a obra do xenial artista coruñés sen agardar polos propietarios do inmóbel (números 25-27 da Rúa Olmos) no que se acha.

“Desde o noso punto de vista, non ten sentido esperar máis. A integridade da obra corre riscos. O Concello ten que exercer a execución subsidiaria xa, isto é, proceder directamente a actuar para asegurar a correcta conservación dos murais cargándolle directamente o custo aos propietarios”, indicaba Jorquera.

A alcaldesa anunciou onte que o Concello se dirixiu aos donos do inmóbel para que acometesen a restauración e que, caso de non o facer, a Administración local actuaría de forma subsidiaria.

Demasiado tarde, a xuízo do BNG. Hai xa logo un mes que demandamos a actuación inmediata por parte do Concello e agora o propio informe municipal vénnos dar a razón: os murais corren un serio risco e non hai tempo que perder.

Canto á activación do procedemento para a declaración como BIC, anunciada pola alcaldesa o sábado pasado, cómpre lembrar que meses atrás esta petición a levou ao Parlamento a deputada e número 3 da candidatura do BNG ás eleccións municipais, Mercedes Queixas.

Nunha sesión da Comisión de Cultura realizada o pasado 24 de febreiro, Queixas reclamou á Xunta a incoación do expediente BIC e criticou que as sucesivas denuncias sobre a desprotección dos murais feitas polos colectivos In nave civitas e a Asociación O Mural bateron co “silencio administrativo” por parte quer do Goberno Galego quer do Goberno Local.