Como explicou Soto, a comisión de servizo é a adscrición temporal dun funcionario a un posto de traballo vacante distinto do propio para atender necesidades urxentes e inaprazábeis.

Mais esta figura só pode ser utilizada se hai motivos obxectivos para o facer: só cabe en supostos de “urxente necesidade” e teñen unha “limitación temporal”, dun ano prorrogábel só por outros doce meses.

É obvio que o recurso ás comisións de servizo -no canto da provisión da praza polo sistema da oposición- abre o campo á discrecionalidade e á arbitrariedade, alegou Soto.

O uso, en todo caso, debe ser proporcionado. Os datos que ofreceu Soto mostran que non o está a ser. Durante o bipartito formado polo PSOE e o BNG no mandato 2007-2011, só se cubriron 25 prazas con comisións de servizo. O Goberno Local do PP (2011-2015) xa supuxo un incremento, 71. E a cifra aumentou durante o mandato da Marea Atlántica (2015-2019), 79. Mais todos os rexistros foron pulverizados durante o primeiro mandato de Inés Rey (2019-2023), con máis de 200 comisións de servizo. “É dicir, neste concello, case 1 de cada 7 prazas actuais foi outorgada por este procedemento. Folga dicir que estamos a falar, habitualmente, das prazas que ostentan maior xerarquía, o que aumenta a nosa alarma”, precisou Soto.

Canto ao límite temporal, as irregularidades son manifestas, até o punto, remarcou o noso concelleiro, de que “sabemos que hai aínda en vigor comisións de servizo de mandatos anteriores ao primeiro do PSOE na cidade”, denunciou. E a seguir estendeuse: “Este aprazamento sine die, ilegal, das comisións de servizo xa foi obxecto de condena en 2018 por parte dun xulgado do contencioso-administrativo, condena ratificada polo Tribunal Superior de Xustiza de Galiza”.

"Sabemos que hai aínda en vigor comisións de servizo de mandatos anteriores ao primeiro do PSOE na cidade”

Así as cousas, Soto instou o Goberno Local a que poña fin a unha práctica irregular que desmotiva o funcionariado do Concello ao ver que “o seu esforzo” non se valora e que acha atrancos ao progreso na súa carreira funcionarial” ao contemplar como determinadas prazas se cobren con comisións de servizo de persoas vindas doutras administracións públicas.

Na súa resposta, o portavoz do Goberno local atribuíu o aumento no número de comisións de servizo ao feito de nos últimos anos non se teren convocado concursos. Agarda que a convocatoria de novas prazas poda ir normalizando a situación.