En concreto, o BNG pide 120 millóns de euros máis para a cidade nas súas propostas de modificación das contas do Goberno galego para o próximo exercicio.

“Nin A Coruña como cidade nin a comarca coruñesa están representadas no proxecto de orzamentos da Xunta para 2026”, concordaron Queixas e Taibo. “Cal é o proxecto do PP para A Coruña nos orzamentos? Pois política de propaganda e multiplicación de oportunidades perdidas”, resume Queixas. “Que fixo estes anos a Xunta na Coruña, alén da pasarela a Marineda e a plataforma para o baño no Parrote?”, preguntouse a parlamentar nacionalista.

Alén do máis, o PP é un “pésimo xestor”, caracteriza Queixas.

“Vímolo nos incumprimentos do orzamento de 2025, con partidas sen executar e agora desaparecidas como a do Albergue dos Peregrinos, ou con fondos sen executar e agora desprazados a 2026 como a reforma da residencia de maiores Torrente Ballester ou o Centro de Formación da Cidade das TIC”, resaltou.

Os de 2026 son, ademais, orzamentos “decrecentes” en materias tan relevantes como a ampliación do CHUAC –“con menos orzamento do previsto cando Feijoo anunciara que en 2025 as obras estarían rematadas en 80%, sendo que en realidade apenas se chegou ao 10%”- ou no que ten a ver co ensino, cunha drástica caída, por volta do 50%, das partidas destinadas aos centros públicos. Na mesma liña continúan a ser desatendidas as demandas de reforzo nos Centros de Orientación Familiar...

Fronte a este panorama de propaganda, desleixo e desatención, o BNG formula un auténtico proxecto alternativo, “verdadeiramente comprometido coas coruñesas e os coruñeses”.

Da vintena de emendas rexistradas polo BNG a estes orzamentos en relación á nosa cidade, Queixas puxo en destaque tres pola súa evidente relevancia social.

“A primeira, a recuperación do investimento comprometido para a ampliación do CHUAC, cunha emenda por valor de 60 millóns de euros. A segunda, a posta en marcha dun ambicioso plan de acceso á vivenda pública na cidade, con 40 millóns de euros, destinados á unha bolsa de casas baleiras a prezos accesíbeis, a un bono alugueiro para mocidade con criterios sociais, a un programa de rehabilitación, ao impulso ás cooperativas de cesión de uso e ao aumento da oferta de prazas de residencia públicas para estudantes universitarios ou de FP superior. A terceira, o reforzamento dos servizos públicos, desde os centros de saúde até as residencias de maiores”, relatou.

Indo ao detalle, o BNG pide reforzar o persoal sanitario dos COF do Ventorrillo e Orillamar e completar a carteira de servizos do centro de saúde de Novo Mesoiro, ben como tamén crear un centro de día e unha residencia para maiores após 16 anos dun goberno do PP incapaz de dotar A Coruña dunha soa praza pública.

Canto ao ensino, as emendas do BNG recollen fondos para a reforma integral dos CEIP de Prácticas e CEIP Cidade Vella, para a creación dunha escola infantil en Xuxán e para iniciar o proxecto dun CEIP neste barrio novo da cidade.

No que atinxe a cultura, as propostas do BNG van na dirección de a Xunta se comprometer co deseño dun plan de posta en valor do legado depositado na Fundación Luís Seoane, alén de demandar un aumento significativo da partida orzamentaria para o apoio ao Consorcio para a Promoción da Música, de modo a ir amortizando de vez a débeda que a Xunta ten contraída coa Orquestra Sinfónica de Galiza.

Emendas para a comarca

O reforzamento dos servizos públicos -coa creación dunha escola infantil en Oleiros ou a dotación de máis prazas públicas nas residencias de Cerceda e Carral- e o desenvolvemento dun Plan de Industrialización da comarca -cunha partida de 5 millóns de euros- son as prioridades das emendas do BNG relativas á comarca.

“Non vemos a comarca da Coruña nestes orzamentos. Non hai o mínimo compromiso por parte da Xunta con ela”, lamentou Iria Taibo, quen criticou tamén a falta de transparencia das contas. “Faltan partidas específicas e territorializadas, o cal dificulta moito o traballo da oposición e constitúe un engano á cidadanía”, resaltou.

As contas revelan tamén a insuficiente política de Vivenda da Xunta. “Só orzan 80 mil euros para desenvolvemento de solo en Arteixo. Só 80 mil euros para toda a comarca”, denunciou.

Tampouco as políticas de mobilidade resolven os problemas da comarca. “Continúan sen planificar a conexión da Vía Ártabra coa A6, actuación que desde logo si recollen as nosas emendas”, concluíu.

Asistiron á conferencia de prensa os portavoces do BNG de Cambre (Dani Carballada), Culleredo (Tono Chouciño) e Cerceda (Alberte Sánchez).