A Coruña, 16 de abril de 2013.- O BNG da comarca da Coruña pon de manifesto que non é suficiente a paralización dos 142 despedimentos previstos por Atento no centro de traballo que hai na cidade e esixe a súa retirada definitiva. Así, o responsábel comarcal do BNG, Paulo Carballada, apela á necesidade de participar na mobilización que terá lugar esta tarde para que esta paralización se converta nunha anulación dos 142 despedimentos. “É necesario que apoiemos as traballadoras que deciden manifestarse esta tarde como unha demostración de resposta para a defensa dos postos de traballo en Atento”, salienta.

Carballada sinala que a CIG e a CGT revelaron que o Comité de Empresa da Coruña non ten ningunha convocatoria da compañía para negociar nada e que non existe mesa de negociación ningunha. Tamén advirte da posibilidade de que a empresa tome decisións fóra do ámbito do centro de traballo da Coruña e das representantes das traballadoras e pon de manifesto que “ao BNG non lle vale que se lle poñan prezo aos despedimentos”. “Para o BNG a única solución pasa pola anulación dos 142 despedimentos”, conclúe.

Así, o BNG, representado pola súa militancia e por cargos orgánicos e institucionais, como o propio Carballada, o portavoz do BNG no Parlamento, Francisco Jorquera, ou as concelleiras do BNG Concello da Coruña, participará esta tarde na manifestación que parte ás 20h desde a sede de Atento (r/Juan Flórez, 80). As nacionalistas chaman a cidadanía a sumarse á mobilización e a apoiar as traballadoras que deciden manifestarse.