“Manifestamos o noso apoio ás medidas anunciadas por Inés Rey”, afirma Jorquera, quen a seguir salienta que o Pleno do pasado 4 de xullo aprobou un texto do BNG por medio do cal se instaba o Executivo coruñés a adoptar as medidas extraordinarias que fosen necesarias para evitar que a situación derivase nun problema de saúde pública.

De resto, Jorquera alerta de que “non estamos só ante unha situación que pode pór en risco a saúde das coruñesas e os coruñeses, senón tamén ante un conflito que pode provocar un grave problema de seguridade cidadá, como se viu coa queima de contedores en distintos puntos da cidade, algúns dos cales mesmo puido provocar o incendio dalgún edificio, coas consecuencias terríbeis que diso se podería derivar”.

Naturalmente o BNG defende o dereito das e dos traballadores á folga, mais o que está a acontecer na cidade “non é unha folga ao uso”, senón unha “chantaxe inaceptábel” por parte dun grupo -investigado por graves delitos-que se quere arrogar as competencias sobre a contratación e a promoción interna do persoal nunha empresa concesionaria dun servizo de titularidade municipal. “E esa pretensión é absolutamente inadmisíbel”, conclúe.