Denuncia na iniciativa Jorquera que os condutores do Masterchef non só se mofaron do noso idioma, senón que mesmo, en declaracións posteriores, o rebaixaron á categoría de dialecto.

Lembra o voceiro nacionalista que o programa contou cunha xenerosa subvención do Consorcio de Turismo da Coruña, por importe de 50 mil euros.

A falta de rigor dos condutores do programa –a falaren de anisakis nunha peza de peixe, cando abonda con o limpar ben ou con cociñalo a unha temperatura adecuada- e a ridiculización do acento das persoas galegas foi tal que cómpre unha protesta formal por parte da alcaldesa da cidade, considera Jorquera.

Non é de recibo, alega, que unha televisión pública nos falte ao respecto e é “insultante” que o faga despois de ter recibido diñeiro precisamente do Consorcio de Turismo da Coruña, conclúe.