A razón que aduce o Goberno Local é que o crecemento das raíces provoca o levantamento do pavimento nas beirarrúas e se constitúe nun atranco para o tránsito peonil.

Jorquera quere saber cantos exemplares se tallarían, se estudou o Goberno Local outras alternativas como a reforma ou ampliación dos alcorques ou se considerou tamén a posibilidade de retirar os exemplares para os plantar noutros emprazamentos da cidade.

Para o BNG, e coa vista posta no futuro, sería ben “mudar progresivamente a configuración das rúas, creando medianas arboradas, no canto de plantar árbores nas beirarrúas”.

Jorquera salienta que as árbores non só proporcionan sombra e embelecen a urbe, senón que tamén xogan un rol esencial no combate contra as alteracións climáticas, “pois actúan como sumidoiros de carbono e nas épocas de calor contribúen para moderar a temperatura, atemperando as chamadas ‘illas de calor’ provocadas polo asfalto, os edificios e as emisións dos vehículos”.

As estimacións sitúan en 25 mil o número de árbores na nosa cidade, moi por baixo dos 40 ou 50 mil que as persoas expertas consideran óptimo para unha urbe de 250 mil habitantes