O noso candidato a Alcaldía para as próximas eleccións municipais, Francisco Jorquera, vén de facer esta mañá unha primeira valoración a respecto do avance dos orzamentos xerais do estado no que ten que a ver cos investimentos destinados para A Coruña e a nosa comarca.

Deste xeito, Francisco Jorquera denunciou, a falta de facer un estudo de detalle e segundo puido destacarse das informacións periodísticas que hoxe aparecen na prensa, que hai proxectos fundamentais para a comarca e para a cidade da Coruña que están infradotados, cando non desaparecidos dos orzamentos, e poñía como exemplos a liña férrea entre A Coruña e Ferrol, o acceso ferroviario ao Porto Exterior, a conexión do acceso á propia Punta Langosteira coa Terceira Rolda, o Vial 18, algo, que desde o seu punto de vista ten responsábeis:

“O sucursalismo é un mal negocio para Galiza e para a cidade da Coruña: queremos lembrar que este proxecto de orzamento é froito dun pacto entre o Partido Socialista e Podemos, coas Mareas coaligadas en Podemos, e a actitude de supeditación ás direccións estatais destes partidos fixo que desaparecesen cuestións claves e investimentos necesarios para a nosa cidade”, advertía o candidato nacionalista á Alcaldía.

Neste sentido, o propio Jorquera poñía cifras da caída dos investimentos que se recollen nos OXE a respecto do ano 2018, xa que logo cuantificaba nun 20% aproximadamente a diminución para o conxunto de Galiza, aumentando esta cifra para a comarca até nun 23%.

Para Jorquera esta diminución é escandalosa e amosa a nula capacidade de incidencia e a submisión por parte da representación política de Galiza no Congreso das deputadas e dos deputados que “non se preocuparon de meter na axenda asuntos clave para Galiza e para a Coruña”.

“No proxecto dos OXE presentado onte consignanse o que é, a efectos prácticos, unha cuantiosa condonación da débeda para o porto de Valencia mentres que non acontece o mesmo para coa débeda contraída pola Autoridade Portuaria da Coruña. Cabe lembrar a nosa demanda histórica de que se financie o Porto Exterior de Punta Langosteira a conta destes orzamentos, algo que novamente non acontece e que significa un agravio comparativo para a nosa cidade e comarca”, concluía o noso candidato Francisco Jorquera.

A Coruña, 15 de xaneiro de 2019.