O BNG critica que o Sr. Negreira non se preocupara por resolver o futuro de Alcoa

BNG da cidade da Coruña 25 set. 2012 - 20:14

bng non alcoa sr negreira futuro

A Coruña, 25 de setembro de 2012.- O Grupo Municipal do BNG insta o Sr. Negreira a abandonar a política das palabras para se centrar na política dos feitos, en relación ás declaracións sobre Alcoa. Lembran os nacionalistas que o Goberno local non se preocupou até o de agora por solucionar o futuro laboral dos traballadores de Alcoa.

Precisamente, o BNG presentara no mes de xullo unha pregunta para a resposta escrita na que se interesaba polas actuacións que desenvolvera o alcalde para o cumprimento da moción aprobada por unanimidade no Pleno. A vaguidade da resposta do Goberno local, dá a entender que non levou a cabo contacto ningún para cumprir o acordo da moción e para garantir o futuro da factoría.

Ao Sr. Negreira deberíaselle de caer a cara de vergoña coa súa compañeira Beatriz Mato que, malia ser a conselleira do ramo, se declarou incompetente para solucionar o problema de Alcoa

O Grupo Municipal do BNG pon de manifesto que ao Sr. Negreira se lle debería de caer a cara de vergoña coa súa amiga Beatriz Mato, número 1 do PP pola Coruña, quen eludiu o conflito de Alcoa ao negar que for competencia da Xunta de Galiza. Os nacionalistas ven lamentábel que a conselleira que, supostamente, debería velar polos traballadores e traballadoras, se declare incompetente para mediar nos problemas que sofren os empregados desta empresa.

O Grupo Municipal do BNG considera unha perda de oportunidade que Mato se desmarcara do futuro laboral de Alcoa, malia ter de presidente do Goberno central o seu compañeiro de partido. Lembran os nacionalistas que o Estado pode solucionar o problema da tarifa eléctrica, asunto distinto é a incapacidade da "conselleira do desemprego" para interceder en defensa do mantemento dos postos de traballo no país. O BNG, que xa diante de todas as institucións, e desde meses atrás, defendera a continuidade de Alcoa, critica que nin a coruñesa Beatriz Mato nin os deputados do PP pola Coruña se preocuparan por solucionar o futuro de Alcoa, que ameaza con converter a nosa comacra nun gran deserto industrial.

Por último, os nacionalistas advirten de que Alcoa precisa saber se vai dispór dunha tarifa enerxética competitiva antes do 5 de outubro (prazo relacionado cos prazos para pechar os contratos cos seus clientes para o vindeiro ano).

O BNG apoiará os traballadores na concentración de mañá

O BNG da Coruña amosa o seu apoio aos traballadores de Alcoa, que se concentrarán mañá, mércores, ás 12h, fronte á Delegación do Goberno.