A pesar de estar previsto no proxecto de ampliación de BiciCoruña -un medio de transporte público xestionado por EMVSA, Empresa Municipal de Vivenda, Servizos e Actividades-, o certo é que o novo curso académico da Universidade da Coruña comezou sen que o Concello dotase o Campus de Elviña dunha estación deste servizo.

A concelleira do BNG Avia Veira compareceu este xoves ante os medios no campus de Elviña, acompañada por membros de Galiza Nova, para demandarlle ao Goberno Local que reforce as liñas do bus que emprega a mocidade universitaria.