O BNG -que levou o asunto ao Pleno da semana pasada, en forma de rogo oral- asume así unha proposta lanzada desde a Asociación Veciñal de Novo Mesoiro.

“Rubén foi un defensor dos dereitos da comunidade LGTBI, que é o mesmo que dicir que foi defensor do ben común”, refire o autor da iniciativa, o noso concelleiro David Soto.

Soto remarca o rol de Ruby como colaborador do Sex Point do Comité Antisida da Coruña: “Impulsou un proxecto necesario para esta cidade que serviu para mellorar a vida de centos de persoas, para dar acollida e acompañamento a quen máis o necesitaba e para espallar a conciencia sobre cuestións tan relevantes como a loita contra a exclusión social, a saúde sexual ou a defensa da diversidade”.

Ruby foi veciño de Novo Mesoiro, barrio no que tamén mora David Soto, “un barrio novo, pero cun fortísimo sentimento de comunidade”, nado das achegas á vida comunitaria feitas por persoas como este activista polos dereitos do colectivo LGTBI.